15 студзеня ва ўсіх паўлінскіх кляштарах ва ўсім свеце адзначаецца ўрачыстасць св. Паўла Першага Пустэльніка. У нашых касцёлах збіраецца мноства людзей, каб ушанаваць першага хрысціянскага манаха, які з Волі Божай пакінуў свет, пасяліўся ў Тэбаідскай пустыні ў Егіпце, і там пражыў 90 гадоў у поўнай адзіноце. Беларускія кляштары не выключэнне. Айцы паўліны з Карэлічаў і Гомеля ўрачыстасцю свайго святога Патрыярха таксама распачалі святкаванне 30-годдзя прысутнасці і душпастырскай паслугі ў нашай краіне.
У Карэлічы на ўрачыстасць прыбылі госці з навакольных вёсак і іншых гарадоў. Св. Імшу цэлебраваў пробашч а. Ежы Саковіч OSPPE. На пачатку літургіі а. Ежы ўспомніў 1993 год, калі Касцёл даручыў Ордэну св. Паўла Першага Пустэльніка адказную місію душпастырства ў Гродзенскай дыяцэзіі. Казанне прамовіў а. Ануфрый Альховік OSPPE, у якім казаў пра аскетычнае жыццё і цяжкасці ў пустыні св. Паўла з Тэбаіды.
На заканчэнне ўрачыстасці ўсе госці атрымалі пачастунак ад св. Паўла Пустэльніка: фінікі і фігі, якімі штодзённа харчаваўся на пустыні св. Павел, і хлеб, на ўспамін хлеба, які штодзённа прыносіў крумкач св. Паўлу.
У Гомелі ўрачыстую св. Імшу ў паўлінскай парафіі Унебаўзяцця НПМ ўзначаліў дапаможны біскуп Пінскай дыяцэзіі Казімір Велікаселец. Разважаючы над нядзельным Евангеллем, у якім успамінаецца св. Ян Хрысціцель, іерарх адзначыў, што св. Павел Тэбскі быў падобны на св. Яна, які, навучаючы ў Юдэйскай пустыні, меў адзенне з вярблюджай воўны і скураны пояс на бёдрах, ежай якому была саранча і дзікі мёд. Св. Павел так палюбіў Бога, што падчас пераследу веры пайшоў у пустыню, каб там практыкавацца ў цнотах і дасягаць хрысціянскай дасканаласці. Ён з’яўляецца для нас прыкладам сціплага жыцця ў цішыні, “сам-насам з Богам”. Апошнія словы з’яўляюцца дэвізам Ордэна Паўлінаў. Вернікі, разам з пробашчам а. Леанардам Адушкевічам OSPPE i а. Майклам Окіка OSPPE, прасілі Бога праз заступніцтва св. Паўла Тэбскага, Першага Пустэльніка, аб дапамозе ў будаўніцтве касцёла.
Пасля Святой Імшы, паводле даўняй паўлінскай традыцыі, пробашч парафіі а. Леанард Адушкевіч OSPPE пачаставаў усіх прысутных фінікамі, якія некалі спажываў на пустыні св. Павел.
